РЭСПУБЛІКАНСКАЯ ВАЛЕЙБОЛЬНАЯ ЛІГА СТАРТАВАЛА Ў ГЛЫБОКІМ
Сёлета Рэспубліканская ліга стартавала ў нашым горадзе, і гэта сведчыць пра многае. Найперш пра высокі ўзровень Глыбоцкай школы валейбола, ля вытокаў якой стаяў Іван Іванавіч Дубіна, на сёння адзін з трэнераў валейбольнага клуба "Шахцёр" Салігорск. Пра гэта, у прыватнасці, сказаў госць спартыўнага свята, наш зямляк, былы ігрок нацыянальнай каманды па валейболе Вадзім Міцько:
– У тым, што некаторыя з нас ігралі і іграюць за зборную каманду Беларусі, выступаюць за мяжой, канечне ж, вялікая заслуга Івана Іванавіча. I я рад, што закладзеныя ім спартыўныя традыцыі плённа развіваюцца ў раёне і сёння, што ў Глыбокім любяць і папулярызуюць гэты від спорту і на юнацкім узроўні дабіваюцца добрых вынікаў.
– Вадзім, на працягу некалькіх гадоў вы былі ў складзе нацыянальнай каманды і лічыліся адным з самых моцных ігракоў. На якой пазіцыі на валейбольнай пляцоўцы вы адчувалі сябе найбольш камфортна?
– Прыходзілася гуляць і на пазіцыі першага тэмпу, дыяганальнага іграка і на пазіцыі даігроўшчыка. I ўсюды адчуваў сябе вельмі добра. А яшчэ лепш, калі каманда выйгравала.
– I як склаўся ваш лёс пасля таго, як закончылі выступаць за зборную? Дзе гуляеце сёння?
– 3 вялікім спортам я ўжо развітаўся, калі і гуляю, то на аматарскім узроўні. Сёння ж трэнірую юнацкую каманду гомельскага ліцэя Міністэрства па надзвычайных сітуацыях, якую і прывёз на I тур Рэспубліканскай дзіцяча-юнацкай лігі. Рад, што тур праходзіць у Глыбокім, на маёй малой радзіме.
– I як успрынялі вынік сустрэчы паміж гомельскай і глыбоцкай камандамі?
– Мы прайгралі ў гэтай барацьбе. Рад, што глыбачане выйгралі, і расстроіўся, вядома, што мае ігракі прайгралі. Але ж гэта першае выступленне каманды ліцэя на такім высокім узроўні. I я ўпэўнены, што ў Рэспубліканскай лізе мы пра сябе яшчэ скажам сваё слова.
А вось юныя валейбалісты Глыбоцкай дзіцяча-юнацкай спартыўнай школы (трэнер – Вікторыя Лук'янёнак) сваё слова ў лізе сказалі ўжо: неаднойчы нашы ігракі прабіваліся ў фінал гэтага турніру. А вось перамогі на такім высокім узроўні яшчэ не было. Значыць, з гэтага года трэба пачынаць.
Дарэчы, перад першым турам Рэспубліканскай дзіцяча-юнацкай валейбольнай лігі каманда Вікторыі Лук'янёнак прымала ўдзел у міжнародным турніры ў Гродна і стала сярэбраным прызёрам.
Паспяхова выступілі нашы юныя спартсмены ў родных сценах і ў першым туры Рэспубліканскай валейбольнай лігі: чатыры гульні – чатыры перамогі. Пры гэтым тры з іх – з лікам 3:0. І толькі ў сустрэчы з сапернікамі са спартыўнай школы алімпійскага рэзерву горада Гродна завязалася ўпартая барацьба. Яе вынік – 2:1 на карысць глыбачан. Дарэчы, на гэтай гульні прысутнічаў старшыня райвыканкама Аляксандр Шубскі.
Першы тур – за намі. Новыя перамогі – наперадзе. Лепшым іграком у складзе каманды Глыбоцкай дзіцяча-юнацкай спартыўнай школы прызнаны Артур Пачопка.
Алесь ЖЫГУНОЎ.
Фота Ліліі ГАПОНЕНКІ
